SPANJE/ Në konferencën për shtyp, trajneri i “los blancos” Zinedine Zidan, i pyetur nga gazetarët për të ardhmen e tij, ka thënë se ka momente kur duhet të qëndrosh dhe ka momente kur duhet të largohesh për të mirën e të gjithëve.
“Pyetja për të ardhmen time, më është bërë e mërzitshme, pasi kemi akoma edhe dy javë për të luajtur, ndaj nuk e di çfarë do të ndodhë më pas. Mund të ndodhë gjithçka dhe unë po bëj maksimumin. Sigurisht, që ka momente kur duhet të qëndrosh dhe të tjera kur duhet të largohesh për të mirën e të gjithëve”,- ka thënë francezi.
Real Madridi është ende në garën për titull, kur nesër do të përballet me Athletic Bilbaon, duke shpresuar në një gabim të Atletico Madridit. “Kur ulem në bankinën e Realit, kam ende të njëjtën dëshirë për të fituar, si në ndeshjen e parë. Besojmë ende te titulli, edhe pse tani nuk është më në dorën tonë, megjithatë nuk duhet të ndjekim kundërshtarët, por të bëjmë detyrën në ndeshjet tona, duke nisur nga nesër në ndeshjen ndaj Athletic Bilbaos”,- ka deklaruar Zidane.
