ITALI – Kombëtarja e Suedisë ka njoftuar, se sulmuesi i Milanit, Zlatan Ibrahimoviç, nuk do të jetë pjesë e saj dhe për pasojë nuk do të luajë në ndeshjet finale të Kampionatit Europian, që nisin më 11 qershor.
Lajmin e bën të ditur fillimisht gazetari italian Fabrizio Romano, i cili i referohet federatës nordike. Në takimin e të martës, në kuadër të javës së 36-të të Seria A, sulmuesi suedez i kuqezinjve pësoi një lëndim në fitoren 3-0 të Milanit ndaj Juventusit.
E megjithëse lëndimi fillimisht nuk u duk aq serioz, pas ekzaminimeve mjekësore, stafi i kombëtares suedeze ka vendosur mos ta inkuadrojë Zlatan Ibrahimoviçin në ekip për Kampionatin Europian.
“Sot Ibrahimovic ka njoftuar trajnerin Janne Andersson se dëmtimi nuk do ta lejojë të luajë në Kampionatin Europian të Futbollit. Shpresojmë t’ju shohim në fushën e futbollit sa më shpejt Zlatan”, ka shkruar në “Twitter” federata suedeze.
Pas largimit dhe lamtumirës vite më parë, Ibrahimoviç, edhe pse në moshën 40-vjeçare, u rikthye në kombëtaren e Suedisë në ndeshjet e marsit, ku luajti edhe ndaj Kosovës.
