Të martën e kaluar (11.05.2021), ka ndodhur një ngjarje skandaloze në shkollën “Faik Konica” në Prishtinë.
Në oborrin e kësaj shkolle disa nxënës të klasës së shtatë kanë ngacmuar seksualisht një vajzë të po kësaj shkolle të klasës së parë.
Të miturit me vetëdije të plotë aktin e tyre, e xhirojnë dhe tallen me vajzën, e cila tenton të mbrohet. Madje ata qeshin dhe xhiruesi (djali i tretë në këtë akt), i tregon që tashmë ka lëshuar videokamerën dhe po xhiron.
Në bashkëpunim me Policinë e Kosovës si dhe me Prokurorinë e Shtetit kjo video është fshirë nga sistemi i portalit për shkak të ndjeshmërisë së rastit.
Për këtë rast është në dijeni edhe drejtoresha e shkollës, Jehona Oruqi, e cila, sipas burimeve vetëm i ka qortuar nxënësit duke u thënë se nuk është dashur që të shpërndahet kjo video.
(Për shkak të moshës së fëmijëve, të dhënat e tyre janë mbajtur sekret)
Edhe pse është tentuar që të merret një qëndrim nga ana e drejtoreshës Oruqi, por deri në momentin e publikimit të këtij lajmi, ajo nuk i është përgjigjur thirrjeve dhe mesazheve.
Policia e Kosovës ka thënë se lidhur me këtë rast janë marrë të gjitha informacionet e nevojshme, dhe se ky rast është duke u trajtuar bashkë me drejtues të shkollës në fjalë ku edhe ka ndodhur sulmi seksual si dhe me zyrtarë tjerë të Qendrës për Punë dhe Mirëqenie Sociale si dhe Prokurorinë e Shtetit.
Edhe pse ky ngjarje është e një përmase shumë të shëmtuar dhe që trondit themelet e shoqërisë tonë, nuk i është dhënë vëmendja që duhet nga mediat kryesore.
Së fundmi, në rrjet është përhapur me shpejtësi kjo ngjarje skandaloze, ku artistë dhe lëvizje për të drejtat e njeriut kanë ngritur zërin dhe kanë dënuar këtë fenomen.
Nën moton: “Në shkollë nuk vajta për t’u abuzuar”, ato u kanë bërë thirrje institucioneve përgjegjëse që të marrin masa pasi kjo video është filmuar në ambientet e shkollës, aty ku drejtoresha dhe mësuesit e kanë bërë një vesh dhe në sy qorr, duke mos pranuar përgjegjësinë e tyre.
Lëvizja për të drejtat e femrave “Pink Movement”, i ka kushtuar një hapësirë të gjerë kësaj tematike.
“Nisur nga rasti i publikuar i bejme thirrje institucioneve perkatese te marrin masa.
Nje video u publika ku disa djem te klases se 7 filmonin nje vajze ne klasen e pare dhe abuzonin me te.
Video-ja eshte filmuar ne ambientet e shkolles ne Kosove.
Ku ishin mesuesit? Drejtoresha?
Kush mban pergjegjesi? Kush eshte shkarkuar nga puna?
Cfare po ndodh me djemte qe kishin bere kete akt?
A eshte vizituar vajza nga psikologia?
Pse skane reaguar masivisht media?
Flisni per fenomenin jo per femijet e videos.
Mos kerkoni te hiqet video-ja qe NUK tregon fytyra vetem me shpresen se nuk do te behet skandal.
SKANDALI ka plasur si bomb sepse nje vajze e mitur eshte abuzuar!
Sa djem ka Kosova dhe Shqiperia si ata ne video? Askush nuk po i meson ndryshe.
Merrni masa TANI!
Ne shkolle shkojme per te mesuar , JO PER TU ABUZUAR”, shkruhet ne postimin e “Pink Movement”.