RUSI- Rusia ka paralajmëruar të gjitha vendet perëndimore mbi zotërimin e rajonit të Arktikut. France24 shkruan se Ministri i Jashtëm rus, Sergei Lavrov paralajmëroi të hënën vendet perëndimore kundër ngritjes së pretendimeve mbi Arktik-un, pasi ngrohja globale po e bën rajonin më të arritshëm nga fuqi të tjera.
Komentet e Lavrov erdhën përpara një takimi ministror të Këshillit të Arktikut që përfshin Rusinë, Shtetet e Bashkuara, Kanadanë, Norvegjinë, Danimarkën, Suedinë, Finlandën dhe Islandën të Mërkurën dhe të Enjten në Rejkavik. Ministri i jashtëm rus u shpreh se “ne do të flasim për këtë sinqerisht” në takimin ministror të tetë vendeve.
“Ka qenë absolutisht e qartë për të gjithë për një kohë të gjatë se ky është territori ynë, kjo është toka jonë. Ne jemi përgjegjës për të siguruar që bregu ynë Arktik është i sigurt. Kur NATO përpiqet të justifikojë përparimin e saj në Arktik, kjo është ndoshta një situatë pak më ndryshe dhe këtu kemi pyetje për fqinjët tanë si Norvegjia të cilët po përpiqen të justifikojnë nevojën që NATO të vijë në Arktik,” tha Lavrov.
Ndërsa ndryshimi i klimës e bën Arktikun më të arritshëm, interesi global për burimet natyrore të rajonit, rrugët e tij të lundrimit dhe pozicioni i tij strategjik është rritur midis anëtarëve të Këshillit të Arktikut si dhe Kinës. Presidenti Vladimir Putin vitet e fundit e ka bërë rajonin Arktik të Rusisë një përparësi strategjike dhe urdhëroi investime në infrastrukturën ushtarake dhe nxjerrjen e mineraleve, duke përkeqësuar tensionet me anëtarët e Këshillit të Arktikut.
