KOSOVË-Një ngjarje e rrallë ka ndodhur ditën e sotme në Prizren ku një dre është gjendur i bllokuar në një pusetë nga punëtorët e Kompanisë Regjionale të Ujësjellësit “Hidroregjioni jugor”.
Ata kanë arritur ta shpëtojnë frerin e egër dhe e kanë dërguar për trajtim te veterinari. Lajmi është bërë publik në Facebook nga drejtori i Inspektorateve në Prizren, Edon Muçaj.
“Miku im Bardhi sot më njoftoi që me stafin e Hidroregjionit Jugor kishin arritur të shpëtonin një dre i cili kishte ngelur në një nga pusetat tek 40 bunarët. Menjëherë njoftuam organet kompetente dhe dolëm në vendngjarje me ç’rast drerin dorzuam tek Shoqata e Gjahtarëve “Sharri”, të cilët morën përsipër mjekimin e tij deri nesër ku më pas mjekët veterinar do të rekomandojnë për të e lëshuar në natyrë apo jo!”, ka shkruar Muçaj në Facebook duke bashkangjitur edhe fotot e drerit të bllokuar.
Shoqata të ndryshme kohëve të fundit në vende të ndryshme të Kosovës kanë hasur kafshë të rralla që pasurojnë pyjet e Kosovës.
