KOSOVË/ Presidentja e Kosovës Vjosa Osmani, pas propozimit të Ministrisë së Punëve të Jashtme ka dekretuar lirimin nga detyra të 12 ambasadorëve nëpër botë, mes tyre edhe të ambasadorit Gjergj Dedaj, që në këtë pozitë ishte emëruar nga ish-Presidenti Hashim Thaçi në tetor 2018.
Pas shkarkimit të Dedajt nga posti i ambasadorit në Shkup, Ambasada e Kosovës ka mbetur pa shef të misionit, ku zëvëndës i tij është bashkëshorti i presidentes së Kosovës, Prindon Sadriu i cili u ngarkua përkohësisht në pozicionin e shefit.
Prindon Sadriu është diplomat i karrierës në Ministrinë e Punëve të Jashtme. Ai në pozitën e zëvendës-shefit të misionit të Kosovës në Maqedoni ishte emëruar në korrik të vitit 2019, i cili mbanë gradën e ministrit në shërbimin diplomatik të Kosovës. Dje me anë të dekreteve Osmani ka shkarkuar 12 ambasadorë të Kosovës nëpër botë me arsyetimin se janë të emëruar politikisht.
