QIPRO- Një protestë nga disa anëtarë të krishterë ortodoksë dhe klerikë është zhvilluar mbi hyrjen e Qipros në Eurovizion, për të cilën ata pretendojnë se kënga promovon adhurimin e Satanait. Mediat e huaja shkruajnë se protesta, e mbajtur përballë portave të zyrave të transmetuesit shtetëror RIK, ishte e dyta kundër këngës El Diablo të inskenuar nga të krishterë që argumentojnë se është ftesë për të përqafuar djallin.
Si RIK, ashtu edhe këngëtarja Elena Tsagrinou thonë se kritikët kanë keqinterpretuar tekstet e El Diablo dhe se në fakt bëhet fjalë për një marrëdhënie abuzive mes dy të dashuruarve.
Njerëzit që protestuan e panë atë si asnjë arsye për festë, duke këmbëngulur se ‘El Diablo’ ishte një fyerje ndaj besimit Ortodoks të Qipros.
“Kjo këngë nuk përfaqëson Qipron. Nuk e nderon atë. Fyen Qipron, përdhos Qipron dhe është e rrezikshme, të krishterët e mi të mirë ortodoksë,”– tha një klerik pa emër në një mikrofon ndërsa u drejtohej demonstruesve. Është e rrezikshme për fëmijët tanë, për familjet tona. Nuk ka asnjë mundësi që djalli t’i bëjë ndonjë mirë dikujt.”
Kënga kapërceu pengesën e saj të parë gjatë gjysmëfinales së parë dhe arriti në raundin e fundit të konkursit, i cili do të mbahet të shtunën në Roterdam.
