Ka shkuar në më shumë se 717 mijë numri i vaksinimeve të kryera në vend kundër koronavirusit. Nga fillimi i fushatës “Shqipëria buzëqesh” janë bërë 716, 616 vaksina anti COVID. Vetëm në 24 orët e fundit janë bërë 4,170 vaksinime.
Pas një mungese prej pak ditësh, kanë ardhur sot në vend 60 mijë doza të vaksinës kineze Sinovac, për të vijuar pa ndërprerë procesin e vaksinimit masiv. Ministrja e Shëndetësisë Ogerta Manastirliu bëri me dije se nesër do të mbërrijnë edhe 14 mijë doza të vaksinës Pfizer, ndërsa shtoi se brenda muajit maj do të vijnë edhe 40 mijë vaksina AstraZeneca.
Në Shqipëri deri më tani kanë mbërritur më shumë se 830 mijë doza të vaksinës kundër COVID, ndërsa numri i vaksinimeve të kryera, deri dje, është 712 mijë dhe janë më shumë se 240 mijë qytetarë që kanë marrë të dyja dozat.
Epidemiologu Ilir Alimehmeti në një intervistë të mëparshme për Report Tv tha se është i mendimit se ka ardhur koha e lirimit të masave kufizuese në vend, për shkak të situatës të stabiluar nga COVID-19 dhe afrimit të sezonit veror. Duke bërë një krahasim me verën e kaluar, këtë vit përqindja e qytetarëve që e kanë kaluar COVID është më e lartë.
