VLORË– Ambasadorja amerikane në Shqipëri, Yuri Kim ditën e sotme ka vizituar qytetin e Vlorës, ku është është takuar me kryetarin e bashkisë, Dritan Lelin.
Në një postim në rrjetet sociale, Leli tregon se ambasadorja u kthye për ta takuar në zyrat e bashkisë, ndërsa shprehet se e çmon mbështetjen dhe vëmendjen e ambasadores për Shqipërinë dhe Vlorën.
“Ndihem veçanërisht i nderuar që, nga vizita e saj në Vlorë, këtë fundjavë, Ambasadorja e Shteteve të Bashkuara, Yuri Kim, u kthye sërish në bashki. Çmoj mbështetjen dhe vëmendjen e vazhdueshme të Amerikës ndaj Shqipërisë, Vlorës dhe qytetarëve të saj. Forcimi i lidhjes mes dy vendeve, tani edhe përmes #DefenderEurope21, janë rezultati i një miqësie të gjatë, përkrahja e së cilës rrit stabilitetin. USA do të ngelet udhërrëfyesi i rrugetimit tonë drejt të ardhmes”, shkruan Leli.
Takimi i Kim me Lelin, vjen disa kohë pasi kryebashkiaku është “mënjanuar” nga Partia Socialiste prej kryeministrit Edi Rama pasi nuk pranoi që të linte detyrën për të garuar për deputet në qark.
