TIRANË– Kur kanë kaluar më shumë se 10 muaj nga ngjarja që tronditi Shqipërinë, Prokuroria e Tiranës ka dalë në përfundimin se vdekja e dy grave të familjes Josifi ka qenë e pandikuar nga një person i tretë. Hetimi i telefonave celularë dhe detajeve të tjera, duke u bazuar edhe tek dëshmia e të mbijetuarës Blerta Josifi, asnjë prej tyre nuk është ndikuar nga persona të tjerë.
Zhaneta dhe Anisa Josifi, nënë e bijë, së bashku me të mbijetuarën, Blerta, në celular nuk kanë pasur komunikime me asnjë person tjetër përveçse me familjarë. Po ashtu ka rezultuar se vetë kishin vendosur që t’i dedikoheshin sektit fetar.
“Nga verifikimet hetimore të kryera nga nga pyetja e persona që janë dijeni për rrethanat të hetimit, nuk rezulton që në banesën e këtyre personave të jetë hyrë ndonjë person, ato i kanë ndërprerë të gjitha komunikimet me jashtë dhe po kështu nuk kanë lejuar asnjë person që të hyjë në apartamentin e tyre deri në momentin që policia ka shkuat në banesë dhe ka gjetur pa jetë shtetaset Zhaneta dhe Anisa Josifin dhe në gjendje të rënduar shëndetësore Blerta Josifin. Nga hetimi nuk rezulton që gjatë kësaj periudhe ato të kenë frekuentuar ndonjë objekt fetar e po kështu nuk rezulton që në banesën e tyre të ketë vajtur për vizitë ndonjë përfaqësues i komunitetit fetar”, shkruhet në dokumentin e Prokurorisë mes të tjerave. Duke marrë parasysh gjetjet, organi i akuzës ka kërkuar pushimin e çështjes.
Ndërkohë ekspertiza mjeko-ligjore e trupit të dy viktimave ka përcaktuar si shkak të vdekjes të Zhaneta dhe Anisa Josifit mosushqyerjen. Tragjedia ndodhi në muajin korrik. Të treja anëtaret e familjes Josifi besonin në ringjallje dhe vendosën të vetëflijoheshin. Era e rëndë dha alarmin në të gjithë pallatin, duke bërë që zjarrfikësja dhe policia të ndërhynin, duke shpëtuar kështu, të vetmen e mbijetuar, Blertën. Ato kishin humbur edhe të atin shumë vite më parë, për të cilin gjithashtu u deklaruar se kishte kryer vetëvrasje duke u hedhur nga ballkoni.
