Është shumë e mundur që, së shpejti, në godinën, gjithësesi enigmë të Shërbimit Informativ Shtetëror Shqiptar, të mbërrijë një figurë e re; e njohur në Kosovë, për shkak të detyrës së dikurshme të saj, ende e panjohur në Tiranë, duke përjashtuar ata që bëjnë pjesë në rrethin e ngushtë të këshilltarëve të kryeministrit Rama. Kjo grua e re, karizmatike, thellësisht e vendosur, e arsimuar shkëlqyeshëm, që bart me vete edhe bagazhin e duhur për të drejtuar një institucion delikat, quhet Vlora Hyseni.
Emri i saj tani, sëbashku me dosjen përkatëse ndodhet në kabinetin e presidentit Bajram Begaj.
Për shumë kënd, propozimi i shefit të qeverisë, Edi Rama, për të emëruar në drejtimin e shërbimit inteligjent të shtetit shqiptar, Vlora Hysenin, ngjan i papritur. Por Vlora Hyseni nuk është një emër i panjohur në shërbimet inteligjente. Në shkurt 2019, me propozimin e ish-presidentit të Kosovës, Hashim Thaçi, ajo ishte figura e dytë në Agjencinë e Kosovës për Inteligjencë. Në të njëjtën kohë, kryente edhe detyrën e drejtoreshës për marrëdhënie me jashtë në këtë Agjenci. Në dhjetorin e vitit 2020, pas shkarkimit të drejtorit Kreshnik Gashi, për katër muaj ajo do të ishte në krye të institucionit më të lartë të sigurisë dhe të inteligjencës së Kosovës, deri në prill 2021, kur në detyrën e drejtorit u emërua Petrit Ajeti. Pak kohë më pas, emërohet këshilltare për siguri në kabinetin e shefit të qeverisë së Shqipërisë, Edi Rama.
Ky propozim i Ramës, vjen pas dy sprovave të mëhershme nga Kosova, në dy poste të larta drejtuese në qeverinë e Shqipërisë. Kjo e tanishmja përbën një sprovë tjetër, ndoshta më të veçantën: Për herë të parë, një grua mund të drejtojë shërbimin inteligjent, e, për më tepër, ajo është shqiptare e Kosovës, Çka, edhe kështu përbën një risi tjetër historike.
Figura e Vlora Hysenit, edhe më heret, pra, kur ajo ishte në strukturat e larta drejtuese të Agjensisë Kosovare për Inteligjencë ka tërhequr vemendjen, jo vetëm të vendorëve, por sidomos të ekspertëve ndërkombëtarë që monitoronin çështjet e sigurisë në Kosovë. Ajo është njohëse, mund të themi e shkëlqyer e çështjeve të sigurisë, në të njëjtën kohë edhe e marrëdhënieve ndërkombëtare. E formuar në institucione të rëndësishme studimore, Vlora Hyseni ka edhe një bagazh të fortë personal. Në pak kohë ajo arriti të fitojë besimin e disa institucioneve të rëndësishme ndërkombëtare, të krijojë lidhje dhe të shkëmbejë përvoja që ishin dhe vazhdojnë të jenë të rëndësishme. Lehtësisht e komunikueshme, njohëse e mirë e disa gjuhëve të huaja, në fare pak kohë, përmes kontakteve me peshë krijoi imazhin e drejtueses serioze dhe të përkushtuar.
Nga agjensitë e kësaj natyre ajo është quajtur dhe trajtuar si truri i inteligjencës kosovare, dhe, pa asnjë dyshim, figura më karizmatike në strukturat e larta të saj. Njohës të mirë të fushës kanë vlerësuar rolin e saj, jo vetëm në trajtimin e disa problemeve thelbësore me të cilat përballej në atë periudhë kjo agjensi, por edhe si urën e domosdoshme të bashkëpunimit.
Në periudhën e shkurtër kur ajo drejtoi të gjithë sistemin, u thelluan prioritetet e kohës, sidomos veprimet ndaj lëvizjeve ekstreme të religioneve me theks në ekstremizmin e shfaqur në disa rajone të veçanta të Kosovës. U ndërtua gjithashtu një strategji më e detajuar ndaj prirjeve të forcave ekstremiste serbe në veriun e Kosovës dhe jashtë territorit të saj, si dhe pati rritje të dukshme të bashkëpunimit mes shërbimit inteligjent shtetëror të Shqipërisë dhe AKI-së.
Ata që e kanë njohur nga afër, apo kanë bashkëpunuar me të e dinë krejt mirë se tipari thelbësor i saj është vendosmëria, dijenia e thellë dhe përkushtimi. Vartësit e saj në Tiranë, nëse kandidatura do miratohet nga Presidenti, nuk do e kenë të lehtë të përballojnë vrullin e saj në punë.
Urojmë që pas pak ditësh Shqipëria të mundet ta ketë këtë potencë, në krye të Shërbimit të vet Informativ.
