ITALI/ Dy shtetas gjermanë, me kombësi iraniane, janë kapur teksa po largoheshin nga porti i Barit, duke u drejtuar për në Shqipëri, me një sasi prej 30 dozash vaksinash ‘AstraZeneca’. Mediat e huaja raportojnë se vaksinat anti Covid ishin të fshehura në makinën e tyre.
Të dy të dyshuarit, 70-vjeçari Abdolrahim Orangui Asr dhe 73-vjeçari Ghassem Farhadi, u kontrolluan ndërsa hipnin në anijen motorike Aurelia për Shqipërinë. Sekuestrimi i këtyre mallrave është bërë më datë 5 maj, por vetëm sot u raportua nga policia lokale. Sipas raportit të konfiskimit në një qese pije freskuese, e fshehur mirë nën akull, u gjetën tre shishe qelqi që mbanin etiketa me fjalët Vaksina Astrazeneca 5ml.
Dokumentet u dërguan më pas në Prokurorinë Publike të Barit, e cila hapi një dosje për marrjen e mallrave të vjedhura dhe po zbulon origjinën dhe destinacionin e shisheve të vaksinave të sekuestruara.