ITALI/ Kampionati italian mbyll sezonin. Juventus e Milan në Champions League. Ekipi nga Milano rikthehet në kompeticionin më të rëndësishëm për klube pas 8 sezonesh mungesë. Ekipi i Piolit fitoi me shifrat 0-2 ndaj Atalantës në Bergamo falë dy penalltive të ekzekutuara saktë nga Kessie.
Ka bërë detyrën edhe Juventusi që triumfoi me rezultatin 1-4 në transfertën e “Dall’Arës” ndaj Bolognës, duke u ngjitur në vendin e katërt të renditjes dhe duke marrë kështu biletën e fundit për zonën Champions.Chiesa, dy herë Morata dhe Rabiot shënuan për Juventusin, që u paraqit në transfertën emiliane me Cristiano Ronaldon në pankinë, ndërsa Bologna shënoi golin e nderit me Orsolinin në minutën e 86’ të ndeshjes.
Napolit i duhej vetëm fitorja për të qënë pjesë e Champions League, por barazimi me Veronën bën të kaltrit të jenë në Europa League. Skuadra e Gattusos kaloi në avantazh me anë të Amir Rrahmanit ,që shënoi në minutën e 60’ pas një rrëmuje në zonë, ndërsa 9 minuta më vonë protagonist negativ u bë Elseid Hysaj, që ngurroi të largojë një top dhe aty përfitoi maksimalisht Faraoni, duke rikthyer baraspeshën./ dosja.al
